Foya d’ amuzmint: on lipogram’ (si vos n’ savoz ddja çou k’ on λιπωγράμμα pout catchî, sayîz todi do discovri)

Do Bork a Couvin, d’ Otchni a Mâmdî, on-z ôt brutyî k’ åk di måva va-st advini. Kimint ç’ ki l’ informåcion si spårda, ou pa yu, ou kî ç’ ki ‘nd’ a stî l’ prumî sourdant, nouk ni sait. Fok çoula: nos årans do mwais.

Ca nos vîs soçons nûtons, di-st on, soctint dins on grand trô dispû shijh cints ans. Cwand il ont drovou l’ ouy, volant razouyî l’ niyå k’ il avint catchî, sol côp i s’ ont abaiti do histou: « Li pus clapant djowion do niyå! Pus la! Mins… Kimint? Dou ç’ ki…? … Sol tins k’ nos doirmins! On låron! Ou d’ pus d’ onk! Mâria! Li pus xhiltant, li pus frawiant prodût¹ d’ nos djowalîs²! Çou k’ nos avans d’ pus tchir! »

Tot disbåtchîs, strindous, il ont lontins nanxhî tot avå, mins vola: l’ agayon a fotou l’ camp! Fotou l’ camp? I n’ sait cori å lon sins aidant, don! On bandiy a rnaxhî vaici dins l’ trô, il a discovrou l’ niyå, s’ a-t i apicî l’ djowion pol tchôkî dvins s’ lodjmint!

Tot l’ tins k’ i cachint, k’ i rûtyint, k’ i s’ måvlint, il avint l’ sintumint d’ on mancmint: sacwants mots n’ vinint pus si simplumint. Tot dvizant, i tchictint, i s’ brouyint, il arokint so sacwants sons. Vos årîz dit k’ sacwants mots n’ volint pus sôrti, vos årîz dit tos pårlîs ås spitchs plins d’ trôs, cåzu disfirlotchîs.

Onk a sclatchî: « Nondidom! L… l… djins! Sobayî! Nos innmis d’ todi, l… calins, bind… bind… tas d’ disgostants, årint-i moussî vaici tins k’ nos doirmins po scro… scro.. picî l’ djowion? »

« Ås fiziks! Ås canons! Ardans! Nos l’s alans bouxhî djus! Nos l’s alans zigouyî! I n’ wådront k’ po on court moumint çou k’ il ont indjustumint prindou! »

Ricrindoz l’ avni! Ca gn a oûy tot avå, so tos tchmins do payis, on cint d’ foirts nûtons avou pougnårds, bastons, bordons, ki vôrint loukî cori l’ sonk!

Do côp, waitîz a vos, mwints côps k’ il abizrint so vos soûs, tot contant dismoli vos ouxhs po s’ vindjî.

Mins mi ki scrît çouci, dji sai ki l’ djowion n’ a måy sitî catchî dins vos cayôs! L’ agayon si clapant, si rglatixhant, vo l’ la dins m’ pogn da mi, wai, al façon d’ on djoli rond d’ ôr a mitan rcloyou – si doûs dzo l’ mwin k’ on l’ vout tni por lu po todi, sins l’ pårti avou nolu.

1. Ou « prodwît » si v’s avoz ptchî. ↩
2. Sins do noûmot: Onk ki n’ fwait ki do foirdjî tos djowions, al mwin ou avou on maca. Dins ç’ cas ci, li djowion dås nûtons a stî fwait al façon d’ on rond a mitan rcloyou sor lu. ↩