Dj’ a ddja dit tot l’ bén k’ dji pinséve di ç’ live la mins, asteure ki dj’ a tot fwait del lére èn etir, dji vôreu co bén rmete ene paltêye et dire ki « Mignolet » e-st ene des pus felès paskêyes do live. Mins « Nanete » eto, c’ est fleur d’ istwêre: c’ e-st onk des pus beas, si ça n’ est nén l’ pus bea, poirtrait d’ kimére ki dj’ a lî e walon. On-z a l’ idêye, a mezeure k’ on lét tot l’ live, ki li scrijheu e-st èn « ome a feme » mins c’ e-st aprume èn ome kelzès comprind et ki waite di s’ mete a leu plaece. Estant èn ome mi-minme, dji n’ oizreut acertiner k’ il î parvént po do bon (i fåreut dmander a ‘ne kimére, come di djusse), mins c’ est foirt creyåve. « Pate di robete » e-st ene foû bele paskêye eto, ca bén k’ ele n’ a nén l’ air d’ assene, puski l’ personaedje n’ aparexhe ki dins l’ deujhinme mitan.
C’ est drole, et dji n’ sai pocwè, mins l’ oteur dispårtit lu minme ses contes sorlon leu longueu (foirt coûts, coûts, mweyéns, longs) et il astchait k’ les troes k’ dj’ a yeu l’ pus bon do lére, c’ est les troes pus longs. Çou ki m’ fwait sondjî k’ nosse Dumont s’ duvreut rashir a ene tåve et nos ponre on vraiy roman, ou co ‘ne banslêye di lonkès paskêyes.
Co deus mots sol lingaedje. Prumirmint, c’ est plaijhi do vey come Dumont rnovele, nén seulmint li façon do raconter, mins ossu li lingaedje lu-minme, sins mezômenes et sins l’ criyî trop foirt, tot djåzant foirt naturélmint d’ cayets d’ « ôte påt » (li Hongreye, les Amerindyins…), d’ afwaires d’ ådjourdu, avou d’ tenawete on noûmot (émile, mwaisse-voye) et don ci don la on mot rprins å francès cwand i fåt, et vos nd åroz. Adon, dj’ åreu bén yeu vlou k’ i gn åreut yeu on ptit motî å coron do live, ca gn a tot l’ minme, djel doe avouwer, di trop d’ mots et d’ ratoûrneures ki dji n’ kinoxheu nén. Li pus sovint, avou l’ cotoû, ci n’ esteut nén trop målåjhey d’ adviner, mins tot l’ minme… Kimint s’ fwait i? Motoit est ç’ paski vola vint ans k’ dji n’ a pus rén léjhou e walon? (Ni tapé ‘ne copene e walon, d’ alieur…) Motoit est ç’ paski dji n’ so nén aroutiné å walon di ç’ costé la: do lîdjwès d’ inte Hu, Condro et Fåmene? Ou motoit est ç’ ki dji so ramoenrné a çou k’ dji so dins l’ fond: on rcåzeu k’ a oyou do walon estant gamén mins ki n’ a nén yeu l’ tchance del cåzer po do vraiy divant ses dijh hût ans, et ki n’ sait co roter sins crossetes?
Amon Lorint 